Помӧсдін вожсалӧн победа

Помӧсдiн вожса тайӧ йӧзыс вӧлісны фронт вылын да колисны ловъяӧн. Найӧ век помнитісны, кӧні суис Победа лун. Миянӧс дорйысьяс важӧн нин мӧдаръюгыдынӧсь, но казьтылӧмъясыс колисны. Видзам найӧс паметьын.

Александр Васильевич УЛЯШЕВ — СССР-са Народнӧй учитель:

— Чужи да быдми Помӧсдінын. Босьтісны фронт вылӧ 1942 вося декабрын дас сизим арӧсӧн, кор велӧдчи дасӧд классын. Повестка вайисны коймӧд урок вылын. Прӧщайтчи класскӧд, велӧдысьяскӧд, сдайті библиотекаӧ книгаяс да и муні. Кулӧмдінсянь Айкатылаӧдз 40 морт мунім подӧн, некод эз няргы. Нуисны Вӧлӧгдаса 391 запаснӧй полкӧ, сэсся танкъяслы паныд сулалысь торъя батареяӧ, коді вӧлі Грязовец карын. Но артиллеристӧн лоны эз мойви, босьтісны велӧдчыны военнӧй училищеӧ, коді дасьтіс офицеръясӧс. Но и офицерӧн эг ло. Пансис Курскӧй тыш да миянӧс, том курсантъясӧс, шыбитісны сэтчӧ. Me веськалі коймӧд Гвардейскӧй танкӧвӧй армиялӧн квайтӧд танкӧвӧй корпусса 120-ӧд торъя гвардейскӧй сапёрнӧй батальонӧ. Чеччӧдісны эшелонысь да пыр жӧ мӧдӧдісны часьтӧ, коді муніс водзӧ, матыстчис Днепр ю дінӧ. Тадз пансис менам война. Григоровка сикт дорын вуджим Днепр.

Фашистъяс водзсасисны зэв яра. 1943 вося ноябр 3 лунӧ петім босьтны Киев да ноябр 6 лунӧ пырим сэтчӧ. Сэсся мездім Фастов, Бердичев, Житомир, Львов, Перемышль да мукӧд каръяс. Миян батальонлы сетісны Перемышлевскӧй ним, лоис Краснӧй Звезда да Александр Невский орденъяса батальонӧн.

Тышъясӧн муні Польша пыр, вуджи Висла да Одер юяс. Вӧлі медбӧръя ыджыд тышъясын. 1945 вося апрель 16 лунӧ пансис Берлин вӧсна тыш. Матӧ 4 во виччысим тайӧ кадсӧ. Збыль мӧй пом? Но война эз на помась. Прагаса олысьяс кыпӧдчӧмаӧсь фашистъяслы паныд да корисны отсӧг вылӧ. Прагаӧдз воӧдчим куим лунӧн, пырим сэтчӧ буретш май 9 лунӧ. И тайӧ вӧлі миян Победа, тшӧтш и менам Победа. Меным сетісны Краснӧй Звезда да коймӧд тшупӧда Слава орденъяс, кык «За отвагу» медаль, «За взятие Берлина», «За освобождение Праги» да мукӧд медальяс. Уна сьӧкыдлун вуджим. Помнитӧй та йылысь, том йӧз.

Михаил Арсеньевич Игнатов:

— Ачым Помӧсдінса. Босьтісны фронт вылӧ 1942 вося апрель 10 лунӧ. Вӧлі меным 18 арӧс. Веськалі Ленинградӧ. Танкӧвӧй частьын служитi во. 1943 вося январ 24 лунӧ ранитчи. Буретш сэки ӧтлаасисны кык фронт — Ленинградскӧй да Волховскӧй. Госпитальын куйлі нёль тӧлысь. Бурдӧм бӧрын босьтісны училищеӧ, но помавны эз лэдзны, босьтісны десантнӧй группаӧ. Шыблалісны медся сьӧкыд участокъяс вылӧ. 9-ӧд армия, кӧні ме служиті, вӧлі Главкомлӧн Ставкаын резервнӧйӧн. Кытчӧ шуасны, сэтчӧ и мунан. Ковмис воюйтны куим фронт вылын: Ленинградскӧйын, Карельскӧйын да 3-ӧд Украинскӧйын. Сетлісны «За оборону Ленинграда» медаль. Восьлалі став Европасӧ, аддзылі йӧзлысь сизим государство. Верховнӧй Главнокомандование сетліс 7 благодарносьт. Гортӧ локті 1946 воын. Демобилизуйтісны висьӧм вӧсна. Лои инвалидӧн. Но ме рад, мый удайтчис венны Гитлерӧс. А мӧдарӧ кӧ вӧлі? Страк думыштны.

Cтепан Васильевич Игнатов:

— Чужи Помӧсдінын. Война вылӧ босьтісны 1943 вося февраль 23 лунӧ. Вӧлі 35 арӧса. Веськалі Вӧлӧгдаӧ, видзисны сэні март 9 лунӧдз. Сэсянь шыбитісны Рытыввыв фронт вылӧ, Смоленск дорӧ. Лои пулемётчикӧн. Во джын кутім немечӧс водзӧ мунӧмысь. 1943 вося август 7 лунӧ петім тышӧ, мед мунны водзӧ. Пыр и ранитісны, но кокниа. А август 9 лунӧ дойми зэв ёна. Нуисны госпитальӧ. Новокузнецкын куйлі пӧшти во. Врачьяс орӧдісны ӧти кокӧс. Та бӧрын, кыдз инвалидӧс, лэдзисны гортӧ. Пыри уджавны колхозӧ. Пасйылісны Великӧй Отечественнӧй войналӧн орденӧн да медальясӧн. Победа лун нимӧді гортын.

Алексей Сиверьянович Игнатов:

— Чужи-быдми Помӧсдінын. Фронт вылӧ босьтісны 1942 вося апрельын. Велӧдчи да лои танкистӧн. Веськалі Ленинград дорӧ. 1943 воын Мойка дорын вӧлі медводдза тыш. Псков дорын ранитчылі. Ленинградӧс кытшысь мездӧм бӧрын тышкаси Латвияын. Мунім Рига пыр, сэсся водзӧ, Асыввыв Пруссияӧ. Победа йылысь юӧр суис Кёнигсбергын. Радлім ёна. Но миянлы война, вӧлӧмкӧ, абу на помасьӧма. Рытыввывсянь ковмис мунны асыввылӧ, Япониякӧд тыш вылӧ. Меным сетісны «За оборону Ленинграда», «За боевые заслуги», «За победу над Японией» да мукӧд медальяс. Медтӧдчанаыс – коли ловйӧн. А уна сюрс бӧрсӧ эз лок. Ёна и жаль.

Егор Тимофеевич Уляшев:

— Чужи 1919 воын Бадьёльйылын. Войнаӧдз уджалі «Выль войвыв» колхозын. Война вылын вӧлі медводдза лунъяссянь бӧръяӧдзыс. 1939 вося октябрсянь служиті Гӧрд Армияын Ылі Асыввылын. Война пансьӧмсянь кык тӧлысьӧн водзджык шыбитісны рытыввыв граница вылӧ. Служиті Черновицы карын, связьлӧн 96-ӧд торъя батальонын. 1941 вося июнь 22 лунӧ, 6 час асылын, миянӧс чеччӧдісны тревога серти. Карсӧ да шӧр аэродромсӧ немеч бомбитіс нин. Унаӧн пыр жӧ пӧгибнитісны. Медводдза лунӧ юрсӧ пуктісны Бадьёльйылысь Григорий Уляшев да Вӧльдінысь Егор Уляшев. Водзсасим яра. Медводдза лунас немечӧс шыбитлім 8 километр сайӧ. Но водзӧ вынным эз тырмы. Кор миянӧс кутісны кытшавны, бӧрыньтчим приказ серти.

1941 вося сентябр 14 лунӧ ранитчи. Петкӧдісны санинструкторъяс. Бӧрынджык нуисны Крымса госпитальӧ. Враг ӧтарӧ матыстчис да мӧдӧдісны Кавказӧ.

1941 вося ноябрын котыртісны 77-ӧд торъя морскӧй бригада да менӧ, бурдыштӧм бӧрын, ыстісны сэтчӧ. Тадз веськалі Карельскӧй фронт вылӧ. Тшӧктісны босьтны Лысӧй гӧра, кӧні кутчысисны фашистъяс. Кык гӧра костын муніс Финляндияӧ кӧрт туй, и миянлы коліс орӧдны сійӧс. Но гӧрасӧ босьтны эг вермӧй, кӧть пӧгибнитісны унаӧн. Бӧрынджык шыбитім врагӧс 104-ӧй стрелкӧвӧй дивизиякӧд ӧтув. Сэсся вочасӧн йӧтким аслас гуӧдз. Некор ог вунӧд ассьым кувсьӧм ёртъясӧс: комбат капитан Седовӧс, взводса командир Шевченкоӧс, старшина Остапьевӧс да мукӧдӧс. Ӧтлаын воюйтім рочьяс, комияс, украинечьяс, чувашъяс, татараяс да мукӧд. Некор эг видзӧдлӧй национальносьт вылӧ. Сы вӧсна и Победаыс ӧтувъя.Кор миянлы шуисны, мый Германия капитулируйтic, весиг сьӧлӧмъясным топавлісны. Сэтшӧма радлім.

Гижис Александр ШЕБЫРЕВ

Шебырев, А. В. Помöсдiн вожсалöн победа : победалы-65 / [гижис] Александр Шебырев // Парма гор. — 2010. — Апрель 29 лун : фот. . — Перевод заглавия: Победа помоздинских участников войны : победе-65. — На коми яз.

Воспоминания фронтовиков из села Помоздино Усть-Куломского района А.В. Уляшева, М.А. Игнатова, С.В. Игнатова, А.С. Игнатова и Е.Т. Уляшева о Великой Отечественной войне, о боях, в которых участвовали, о полученных наградах.